Австрија го претстави планот за „неутрализирање“ на куќата во која бил роден нацистичкиот лидер Адолф Хитлер.
Владата ја купи градбата со наредба за принудна купопродажба во 2016 година по долг судски процес и сега планира да ја трансформира во полициска станица.
Планот треба да почне да се реализира во ноември годинава и целта е да се спречи куќата да стане собиралиште за неонацисти.
Австриска градежна компанија ќе ги изведе потребните промени на зградата во гратчето Браунау на Ин во Горна Австрија, на границата со Германија.
„Од родната куќа на еден диктатор и масовен убиец ќе се отвори ново поглавје за иднината“, изјави австрискиот министер за внатрешни работи Карл Нехамер.
Компанијата Marte.Marte беше избрана од 12 кандидати кои аплицираа со идејни решенија за „козметички промени“ на градбата што датира од 17. век. Се очекува процесот да биде завршен до 2023 година и ќе чини околу 5 милиони евра.
Има многу малку показатели дека тоа е куќата во која бил роден нацистичкиот лидер. На камен во близина на куќата стои испишано „За мир, слобода и демократија; Фашизам никогаш повторно; милиони мртви нѐ потсетуваат“.
Каменот ќе биде преместен во музеј во главниот град Виена. Локален историчар за BBC изјави дека е многу важно каменот да остане во Браунау.
Хитлер многу кратко време живеел во куќата. Роден е таму на 20 април 1889 година, но само неколку недели подоцна неговото семејство се преселило на друга адреса во оваа област, а кога Хитлер имал три години си заминале од Браунау на Ин.