Помалку од половина од жените се на пазарот на трудот на глобално ниво, што покажува дека родовата разлика се поместила многу малку во последните 25 години, соопштија Обединетите нации.
Според извештајот на ООН „World's Women 2020“, 47 проценти од работоспособните жени имаат работа, наспроти 74 проценти од мажите.
Процентот на жени на пазарот на трудот е уште помал во Јужна и Западна Азија и Северна Африка, каде што работат помалку од 30 проценти од жените.
Пандемијата на коронавирусот веројатно дополнително ќе ја влоши статистиката.
Економскиот потенцијал на жените е дополнително ограничен со неплатената домашна работа, на која тие трошат трипати повеќе часа на ден од мажите.
Жените заземаат 28 проценти од менаџерските позиции и 18 проценти од директорските позиции на глобално ниво, се вели во извештајот.
„Напредокот кон еднаква распределба на моќта и еднаквоста на жените останува недостижен“, рече генералниот секретар на ООН, Антонио Гутереш.
„Ниту една земја не постигна родова еднаквост, а КОВИД кризата се заканува да го уништи и оној ограничен напредок што беше постигнат“, додаде тој.
Извештајот се објавува на секои пет години од 1995 година наваму, со цел да се добие увид во напредокот во областа на родовата еднаквост.