Фудбалерот на Баерн Минхен, Хамес Родригез, е последниот во низата играчи кои искажаа недоверба кон новиот тренер на тимот, Нико Ковач. Хрватот е на мета на медиумите поради лошите резултати, а Родригез воопшто не му ја олеснува работата.
Играчите на германскиот шампион се сѐ понезадоволни од играта и водството на тимот од страна на Нико Ковач, а некои од нив веќе почнаа јавно да го искажуваат нивното незадоволство.
Во последните три натпревари Баерн забележа еден пораз и два нерешени резултати, од кои последниот дојде во мечот против Ајакс од Лигата на шампионите, каде иако играа на домашен терен, едвај се спасија од налетите на холандскиот тим.
Хамес Родригез, колумбиската ѕвезда која пристигна во Минхен од Реал Мадрид, го критикуваше Ковач поради неговиот однос према тимот, сугерирајќи дека тој можеби не е дораснат да води еден тим од рангот на Баерн Минхен.
„Ние не сме ти Ајнтрахт Франкфурт“, му порача Родригез на неговиот тренер, по киксот на домашен терен против Ајакс во натпреварот од ЛШ.
Атмосферата во соблекувалната воопшто не е пријатна за младиот хрватски тренер, а германските медиуми од ден на ден ги засилуваат шпекулациите дека тој ќе биде отпуштен пред јануарскиот преоден рок.
