Играчите на Манчестер Јунајтед имаат очигледен проблем со стилот на менаџирање на нивниот тренер Жозе Мурињо. Последните неколку натпревари сведочат за кризата во клубот, а поранешниот капитен на Јунајтед, Рој Кин, им порача на играчите дека треба што побрзо да го решат овој проблем и да се вратат на победничките патеки.
Жозе Мурињо и Пол Погба во последниот месец се постојано во окото на јавност поради нивните несогласувања околу играта на тимот. Погба дури и ја загуби капитенската лента по неговите коментари дека тимот има погрешен пристап и се брани наместо да напаѓа со сите сили.
„Нормално е дека не може секој тренер да се сложува со секој играч и секој играчи не може да го сака секој тренер. Но, што и да правиш како фудбалер и без разлика каков проблем имаш со тренерот, кога ќе ја поминеш таа граница мора да запомниш дека и понатаму треба да играш за тимот“, вели Рој Кин.
Легендата на Манчестер Јунајтед, Рој Кин, беше еден од најпргавите и најстрасните фудбалери, но и покрај проблемите кои ги имаше со соиграчите и со тренерот, тој секогаш го даваше максимумот кога ќе излезеше на теренот.
„Фудбалерите кои имаат проблеми со нивниот тренер обично си мислат ‘Нема да тренирам бидејќи тренерот ме вознемири’ се плачковци. Во Манчестер Јунајтед не смее да има плачковци. Кога ќе излезеш на тој терен играш за твојата гордост, за твоето семејство, за твојот град, за било што и да те мотивира. Што и да се случува, треба да излезеш надвор и да играш“, додаде Кин.
Неговиот совет за играчите е дека тие треба да го одиграат секој натпревар со сета сила, а откако ќе заврши натпреварот можат да се инаетат со тренерот колку што сакаат. Кин смета дека работата на Мурињо оваа сезона ќе биде пеколно тешка.
Манчестер Јунајтед го забележа најлошиот старт на натпреварувачка сезона во последните 29 години, но тоа не беше во центарот на вниманието поради постојаната расправа помеѓу Жозе Мурињо и Пол Погба. По натпреварот со Валенсија од групната фаза во Лигата на шампионите, Погба изјави дека не му е дозволено да разговара со медиумите.
