Рокенрол пионерот Фетс Домино почина на 90–годишна возраст.
Домино продаде повеќе од 65 милиони плочи, а меѓу најпродаваните синглови се големите хитови Blueberry Hill, Ain't It a Shame и уште многу други рокенрол класици.
Антоин Доминик Фетс Домино е роден во Њу Орлеанс на 26 февруари 1928 година, а во текот на педесеттите и шеесеттите години стана и еден од најпопуларните рокенрол и ритам и блуз музичари.
Роден е во семејство со 9 деца. Неговиот татко бил виолинист, но Фетс сам учел да свири клавир на тогаш популарните стилови регтајм, блуз и буги – вуги.
Професионалната кариера ја започнал во 1949 година, со дебитантскиот сингл The Fat Man, кој постигна огромен успех и беше продаден во милионски тираж.
На музичките листи прв пат се појави во 1955 година со песната Ain't It a Shame, за потоа да сними и други бројни хитови - Be My Guest, I'm Ready, I'm Walkin, а посебно ќе биде запаметен по нумерите Blueberry Hill и Jambalaya.
Во кариерата долга пет децении, најголем успех постигна во педесеттите и шеесеттите години од минатиот век.
Имаше 40 песни на топ – листите на најдобар ритам и блуз песни, како и 11 нумери на рокенрол топ – листите.
Домино беше и еден од првите афроамерикански ритам и блуз музичари кои стекнале популарност кај белата публика, а влијаел и на голем број музичари и пејачи, меѓу кои е и самиот крал на рокенролот Елвис Присли.
Во 1986 година беше внесен и во Куќата на славни на рокенрол музиката.