Според италијанските медиуми, вклучувајќи го и угледниот Corriere dello Sport, Рома размислува ова лето да го донесе напаѓачот на ПСЖ, Мауро Икарди.
Според медиумите во Италија, репрезентативецот на БиХ и напаѓач на Рома, Един Џеко, ќе ја напушти „Волчицата“ на крајот од сезоната, иако неговиот договор важи уште една година, а во моментов заработува 7,5 милиони евра по сезона. Капитенот на „Змејовите“ ги олади односите со тренерот Пол Фонсека и остана без капитенската лента на римскиот клуб.
Џеко беше многу близу до преселба во Јувентус минатото лето, но тој трансфер зависеше од доаѓањето на Аркадиуш Милик од Наполи, па на крајот сè пропадна.
Рома сега размислува да го донесе Мауро Икарди од ПСЖ кој би можело да се најде на продажба од буџетски причини во францускиот гигант. Позајмица со опција за откуп би било добро решение, а пречки се високата плата на Икарди и фактот дека Џеко ќе мора да замине за да му отстапи место.