Еден од најдобрите фудбалери на светот, Кристијано Роналдо, за шпанските медиуми даде изјава што го разбранува фудбалскиот свет.
Како што пренесуваат шпанските медиуми, меѓу кои „Марка“ и „АС“, кои важат за највлијателните во земјата и ретко грешат во проценките и анализите, Реал Мадрид ја прифатил понудата од 100 милиони евра, а Португалецот би требало да премине во Јувентус.
Откако неговата репрезентација испадна од Светското првенство во Русија со поразот од Уругвај (1:2), Роналдо очигледно одлучи ваквата завршница на Мундијалот да ја стави во втор план.
„Ако ме проценуваат на 100 милиони евра, тоа значи дека не ме сакаат“, изјави португалскиот ас и дополнително ја разбранува јавноста.
33-годишниот голгетер никогаш не ги криел неговите симпатии кон „Старата дама“, но се чини е незадоволен што падна во сенка на одредени фудбалери, барем кога е во прашање цената за трансфер.
Сепак, ПСЖ за Нејмар плати рекордни 222 милиони евра, а според сегашната ситуација, Јуве за Роналдо ќе искешира двојно помалку.