Асот на Реал Мадрид Кристијано Роналдо е лут бидејќи шпанското обвинителство го товари за затајување данок, но нема да ја напушти Шпанија, тврди претседателот на клубот Флорентино Перез.
„Роналдо има договор до 2021 година. Она што го знаеме е дека изјави дека е лут на соиграчите. Медиумите пишуваа сѐ и сешто и не можам да им придавам голема важност. Ќе разговараме по Купот на конфедерации“, рече Перез.
Роналдо побара од Перез да го пушти да се префрли во друг клуб откако беше обвинет дека затаил 14,7 милиони евра данок и ги скрил на Девствените Острови, но првиот човек на Реал ја одби таквата опција и уште еднаш застана во одбрана на најдобриот фудбалер во Европа.
„Кристијано е човек со интегритет и ги исполнува своите обврски. Има многу луѓе кои сакаат да го повредат, а ние сме одушевени што е во Реал. Убеден сум дека ќе остане“, рече Перез и додаде дека приоритет сега е да се продолжи договорот со тренерот Зинедин Зидан.