Португалската ѕвезда сега има ист број на одиграни натпревари како и поранешниот голман на Реал Мадрид, а со Меси има ист број на противници против кои постигнал гол.
Кристијано Роналдо синоќа го запиша својот прв настап во дресот на Манчестер Јунајтед во Лигата на шампиони по 2009 година и веднаш успеа да се запише во листата на стрелците.
Вчерашниот натпревар за него беше број 177 во кариерата во најквалитетното европско клупско натпреварување, со што се израмни на вечната листа со Икер Касиљас. Нормално, веќе во наредните кола Роналдо ќе запише и нов настап и со тоа ќе избие сам на врвот, испишувајќи нова историја зад неговото име.
Топ 5 играчи со најмногу настапи во ЛШ:
- Икер Касиљас - 177 (Реал Мадрид, Порто)
- Кристијано Роналдо - 177 (Манчестер Јун., Реал Мадрид, Јувентус)
- Чави Ернандес - 151 (Барселона)
- Лионел Меси - 149 (Барселона, ПСЖ)
- Рајан Гигс - 145 (Манчестер Јунајтед)
Во 13-тата минута од натпреварот Роналдо го отвори резултатот во Берн, гол со кој израмни друг рекорд, овој пат на неговиот вечен ривал Меси. Не за број на постигнати голови, бидејќи на таа листа Роналдо одамна е предводник со 135 гола, туку по број на различни противници на кои им дал гол во Лигата на шампионите.
Јанг Бојс е екипа број 36 на која Роналдо ѝ ја затресол мрежата, а исто толку моментално има и Меси. Нормално, во оваа категорија и двајцата допрва уште ќе се бркаат бидејќи борбата е отворена.
Воедно, Роналдо е рекордер и во други категории: има најмногу постигнати голови во една сезона - 17, најмногу голови во нокаут-фазата - 67, постигнал голови во најмногу финалиња - 3, постигнал барем по еден гол во секој натпревар од фазата по групи во една сезона, а ја држи и најголгата серија постигнувајќи гол на 11 натпревари по ред.
