Кристијано Роналдо ја смири топката во Јувентус пред да замине во акција со репрезентацијата на Португалија.
Завчера, ден по натпреварот против Милан што заврши 1:0 во корист на „Старата дама“, Роналдо му се јавил на капитенот Џорџо Кјелини за да му се извини за своето однесување.
Португалецот беше револтиран бидејќи беше изваден од игра и го напушти стадионот пред да заврши натпреварот. Челниците на клубот не го казнија за ваквото однесување.
Роналдо бил фрустриран бидејќи физички „не е на 100%“, тврди упатениот новинар Паоло Нонмоло и додава дека Роналдо лично ќе им се извини на сите откако ќе се врати во Торино следната недела.
Тоа било единственото барање на шефовите Павел Недвед и Фабио Паратичи.
Маурицио Сари одлучи да го замени Роналдо во 55. минута од натпреварот со Милан, а тоа воопшто не му се допадна на Португалецот кој не сакаше ни да се поздрави со тренерот.
Роналдо се поздрави со Пауло Дибала кој влезе место него, а потоа лут замина во соблекувалната.
