Португалскиот фудбалер Кристијано Роналдо пристигна во „Карингтон“ тренинг-центарот на Манчестер Јунајтед каде планира да разговара за својата иднина со овој англиски клуб.
Роналдо веќе со месеци се поврзува со заминување од Манчестер Јунајтед, а како што претходно објавија сите светски медиуми, неговата желба е следната сезона да игра во тим кој ќе се натпреварува во Лигата на шампионите.
Бидејќи Јунајтед не се пласираше во најелитното фудбалско натпреварување во Европа, Роналдо веднаш почна да бара нов клуб, но со агентот Жорже Мендеш досега не успеа и беше одбиен од Баерн и Челси.
Во последните денови тој беше поврзуван и со Атлетико, но повеќе информации дефинитивно ќе бидат познати во текот на денот кога ќе има разговор со челниците на клубот и тренерот Тен Хаг.
Роналдо во тренинг-центарот пристигна со елегантен автомобил Bentley Flying Spur вреден 250.000 евра, кој го купи во септември минатата година.
Некои англиски медиуми пишуваат дека во тренинг-центарот дошол и Сер Алекс Фергусон.