Португалскиот фудбалер продолжува да заработува на други начини, а сега го отвори својот петти хотел.
Кристијано Роналдо бара начин да го напушти Манчестер Јунајтед, а во меѓувреме заработува на други начини. Неодамна го отвори својот петти хотел и тоа во Маракеш, главниот град на Мароко.
Португалскиот фудбалер веќе има отворени неколку хотели во Лисабон, Мадрид, Њујорк, неговата родна Мадејра, а сега и во Мароко. Сите го имаат истото име, Pestana CR7. Сега се појавија и снимки од новиот хотел.
„Имате сѐ во него, дури и базен на покривот. Одлично е опремен, има 174 луксузни соби. Има и спа центар, теретана, има и можност за изнајмување деловен центар за организирање состаноци. Погледот е прекрасен, бидејќи можете да ги видите планините Атлас. Цените не се евтини, ноќевање чини од 158 до 372 фунти“, пишуваат британските медиуми.
Гостите во неговиот хотел можат да нарачаат разни специјалитети, а тој ја препорачува својата специфична и здрава исхрана. Тоа е наводно и најбараното од менито во хотелскиот ресторан во Маракеш.
„Кога го отворив првиот хотел во 2016 година, мојата амбиција беше да создадам меѓународен бренд. По тој хотел во Мадејра, беа отворени хотели во Лисабон, Мадрид и Њујорк. Овој хотел во Маракеш за мене има посебно значење. Чувствувам посебна врска со овој град“, вели Кристијано.
Новата сезона во Премиер лигата за Роналдо не започна како што се надеваше. Ерик Тен Хаг го испрати на клупата, против Брајтон влезе во игра дури во вториот дел, а неговиот тим го загуби тој натпревар. „Црвените ѓаволи“ денеска ги очекува дуел со Брентфорд, а се шпекулира дека Португалецот ќе биде во стартниот состав за оваа пресметка.