Стрелецот на првиот гол за Јувентус во вчерашниот Суперкуп е пресреќен за првиот трофеј сезонава и верува ова е моментот за пресврт на сезонава.
Кристијано Роналдо синоќа го постигна водечкиот гол за Јувентус, кој и на некој начин беше решавачки бидејќи оној вториот Мората го постигна секунди пред судијата да означи крај.
Португалецот на Instagram се пофали со пехарот и најави будење на „Старата дама“ која во Серија А заостанува, а во последното коло го загуби и големото дерби со Интер, натпревар на кој спиеше и Роналдо.
„Пресреќен сум со мојот 4-ти пехар во Италија... Се вративме! Ова е тој Јуве кој го сакаме, ова е тимот во кој веруваме и ова е духот кој ќе нѐ врати кон победите! Одлично сработено момци! Сѐ до крај!🏆🏳️🏴💪🏽“, напиша Роналдо.
Всушност ова му е втор италијански Суперкуп бидејќи првиот го освои во својата прва сезона во бело-црниот дрес. Има и две Скудета. Како и секогаш, тој атакува на сите можни трофеи бидејќи, како што објави утринава, го обожава чувството да држи нов пехар во рацете.
