Коментарите дека можеби Португалија игра подобро без главната ѕвезда, откако ја средија Хрватска со 4:1, Роналдо ги демантираше синоќа.
„Не читам коментари. Тоа се само мислења“, рече тој околу тоа дека можеби е време Португалија да почне да игра без него. Во 1. коло од Лигата на нации Портѕугалија без него во тимот со 4:1 ја среди Хрватска. Тогаш почнаа чудните коментари.
„Она што го имам направено во кариерата зборува само по себе. Не, јас немам никому што да му докажувам, а доколку некогаш морам да докажам, тоа го правам долу на теренот“, смета Роналдо.
Португалија ја совлада Шведска на гости со 0:2 и тоа со двата гола на капитенот Кристијано Роналдо. Натпреварот се играше на „Френдс Арена“ стадионот во Стокхолм, каде Роналдо еднаш имаше свое шоу. Во реванш баражот за пласнман на Мундијалот 2014 во Бразил, игран во ноември 2013, Роналдо со хет-трик на истиот стадион го сруши сонот за пласман на Швеѓаните за кои ни двата гола на Златан Ибрахимовиќ не беа доволни бидејќи загубија со 1:0 и на првиот натпревар.
„Знаев дека на овој стадион имам оставено свој печат, го знаев тоа. И ако играв, знаев дека повторно ќе направам нешто за паметење“, изјави Роналдо. И токму тоа и го стори, ја повтори историјата. Поради повреда не играше со Хрватска, а постоеше можност да не игра ни синоќа.
Пред синоќешниот натпревар Роналдо имаше 99 голови во португалската репрезентација, а со новите два сега има 101 и влезе во клубот 100.
„Многу сум среќен. Прво, бидејќи тимот победи, што ни беше и цел. Потоа, головите 100 и 101 многу ме прават среќен. Иднината зависи од Бога. Се чувствувам добро, се чувствувам убаво играјќи со овие млади играчи“.
Кристијано Роналдо е само вториот играч во светот кој постигнал 100 или повеќе голови за својата репрезентација. Прва на листата сѐ уште е Иранецот Али Даји со 109 голови, бројка која веројатно Роналдо ќе ја престигне.