Роналдо погоди како во најдобрите денови, Португалија со победа го најави ЕУРО

Фудбалерите на Португалија убедливо ја совладаа Ирска со 3:0 во пријателски натпревар, кој беше последен тест за Португалците пред заминувањето на ЕУРО 2024 во Германија.

Домашните поведоа во 18. минута со голот на Жуау Феликс, а потоа во вториот дел на сцена стапи Кристијано Роналдо.

Во 50. минута постигна извонреден гол кој го потсети на најубавите денови во кариерата, а само десет минути подоцна повторно убаво ја заврши акцијата на својот тим за конечни 3:0.

Така, Португалија по поразот во дуелот со Хрватска (1:2) на кој не настапи Роналдо, успешно го најави претстојното Европско првенство на кое ќе биде еден од главните фаворити.

Португалија е сместена во групата Ф со Чешка, Турција и Грузија, а турнирот го отвора со дуелот против Чесите на 18 јуни.