По трансферот на Меси во ПСЖ на повидок е уште еден голем земјотрес во овој летен преоден рок.
Реномираниот Corriere dello Sport тврди дека агентот на Кристијано Роналдо, Жорже Мендеш, го понудил својот клиент кај шеиците на Манчестер Сити.
Мендеш деновиве е во Лондон, каде работи на други трансфери за други клубови, но информациите од Островот велат дека веќе се видел и со раководството на Манчестер Сити. А, со нив, може да разговара само за еден играч - Кристијано Роналдо.
Шеици, братучеди и подготвени да направат сѐ за да ја освојат Лигата на шампиони. Тоа се газдите на ПСЖ и Манчестер Сити. Парижаните исто така го меркаа Роналдо, но успеаја да го земат Меси, па Португалецот „остана“ за „Граѓаните“. Насер Ал-Хејалфи е претседател на ПСЖ, но парите доаѓаат од катарскиот емир Тамим бин Хамад Ал Тани, братучед на Мансур бин Зајед Ал Нахјан, газда на комапнијата Abu Dhabi United Group која е сопственик на Манчестер Сити. Тоа е фудбалска војна помеѓу двајца моќни братучеди, кои не сакаат да заостануваат зад другиот.
Доколку Роналдо сепак остане во Јуве, повторно во игра се враќа и ПСЖ и тоа со неверојатен план. Имено, договорот на Роналдо со „Старата дама“ истекува наредното лето, па ПСЖ ќе може и него да го зграпчи како слободен играч и сезоната 2022/23 во тимот да ги има двајцата најдобри играчи во овој век, Лионел Меси и Кристијано Роналдо.
