Португалскиот виртуоз ги постигна сите четири голови во победата на Ал Наср на гостувањето против Ал Вехда во натпреварот од 16. коло на саудиското првенство, со што за прв пат во дресот на својот нов клуб покажа што го прави еден од најдобрите играчи на сите времиња, а и зошто е платен 200 милиони евра годишно.
Роналдо одигра навистина одличен натпревар, а беше особено расположен и ефикасен пред противничкиот гол. Првиот гол го постигна во 21. минута, вториот 19 минути подоцна, а потоа уште два гола, првиот од пенал во 53. минута и вториот за конечни 4:0 во 61. минута.
Првиот гол, кој го постигна откако одлично се снајде во противничкиот шеснаесетник, беше и негов јубилеен 500-ти лигашки гол во кариерата. Вкупно, четирите гола на Роналдо постигнати синоќа му донесоа 503 првенствени голови во неговата богата кариера.
Првите три ги постигна за Спортинг, потоа во Премиер лигата постигна 103 гола за Манчестер Јунајтед, потоа 311 за Реал Мадрид, 81 за Јувентус и сега 5 за Ал Наср. Ако ги сметаме сите натпреварувања, Роналдо во клупската кариера на 955 настапи досега има постигнато 706 голови.
Воедно, на овој натпревар го забележа и својот хет-трик број 61 во кариерата.
Одлично е чувството да се постигнат четири гола и да се стигне до 500-тиот лигашки гол во победата на мојот тим“, напиша Роналдо во објава на Instagram и поради таа реченица веќе доби над 11 милиони лајкови.
Интересно, по натпреварот направи необичен потег кога му пријде на главниот судија Ал Харби и го замоли да му ја потпише топката, која, нормално, си ја понесе со себе дома. И не само тоа, туку побара и да се слика со судијата.
Необичното однесување на Роналдо, секако привлече огромно внимание на социјалните мрежи.
