Кристијано Роналдо денеска преку пост на Facebook официјално потврди дека добил близнаци од сурогат-мајка и дека е пресреќен што, конечно, ќе ги види за првпат.
„Му служев на националниот тим, како и секогаш, со тело и душа, и покрај тоа што моите две деца беа родени. За жал, не успеавме да ја постигнеме главната спортска цел, но сигурен сум дека ќе продолжиме да ги радуваме Португалците“, напиша Роналдо, кој вчера го одигра последниот натпревар за тимот на Португалија на Купот на конфедерациите.
„Пресреќен сум што, конечно, за прв пат ќе бидам со моите деца“, додаде тој.
Малку се знае за близнаците што Роналдо ги доби со сурогат-мајка во САД, а ТВ-каналот SIC објави дека децата се викаат Ева и Матео.
Роналдо веќе има син, Кристијано Роналдо Јуниор, кој се роди во јуни, 2010 година.
Од Португалската фудбалска федерација рекоа дека биле информирани пред Купот на конфедерации дека фудбалерот добил близнаци, а сепак одлучил да патува во Русија за натпреварот. Оттаму велат дека тоа е „гест што мора да се нагласи и да се пофали“.