Велеа дека еден од главните поборници за заминување на Солскјер од Манчестер Јунајтед е Кристијано Роналдо. Но, денешната негова емотивна порака фрли сенка на таквите тврдења.
Уште многу пред вчерашниот отказ на Оле Гунар Солскјер се тврдеше дека Кристијано Роналдо ја предводи инцијативата за неговото разрешување. Причината беа, нормално, слабите резултати на тимот.
Кога Кристијано Роналдо во 2003 година дојде во Манчестер како млад и надежен фудбалер од лисабонски Спортинг, таму предводник на нападот беше расниот норвешки голгетер Оле Гунар Солскјер. Со него Роналдо настапуваше во наредните четири сезони, до пензионирањето на Оле. Сега, кога на крајот од август се врати на „Олд Трафорд“, повторно го пречека Солскјер, но оној пат како тренер. За жал, нивната втора соработка траеше кратко, неполни три месеци.
Денеска португалскиот ас на социјалните мрежи објави проштална порака до својот досегашен тренер, а претходно и поранешен соиграч.
„Беше мој напаѓач кога првпат дојдов на 'Олд Трафорд' и беше мој тренер откако се вратив во Манчестер Јунајтед. Но, најмногу од сѐ, Оле е неверојатно човечко битие. Му посакувам сѐ најдобро во што и да е она кое животот го чува за него. Среќно пријателе! Заслужуваш!“, напиша Роналдо.