Капитенот на данската репрезентација, Симон Кјер, најверојатно завчера му го спаси животот на Кристијан Ериксен. Тој беше меѓу првите што дотрчаа до соиграчот откако тој ненадејно падна на теренот.
Тој реагираше храбро и спокојно, му го извади јазикот и се погрижи да остане во вистинската позиција додека не пристигне докторот. Токму тој ги организираше соиграчите да направат жив штит околу Ериксен за да го заштитат од камерите.
Нешто подоцна, кога партнерката на Кристијан Ериксен, скаменета од страв, пристигна на теренот, Кјер прв ѝ пријде и ја утеши.
Неговата брза, сталожена и неверојатно храбра реакција беше пречекана само со пофални зборови ширум светот, а клубот за кој игра, италијански Милан, размислува и да му оддаде почест за ваквото дело.
Навивачите на „росонерите“ ги преплавија социјалните мрежи со идејата да му се даде капитенската лента во Милан на Кјер.
Хаштагот #KjaerCapitano вирално се шири на Twitter, а La Gazzetta dello Sport објави дека тренерот Стефано Пиоли и тимот ќе дискутираат за предлогот.
Алесио Ромањоли е капитен на тимот од Сан Сиро од 2018 година, но се смета дека тој нема да остане уште долго со Милан.