Роверот Perseverance на НАСА можеби уште се снаоѓа во новиот дом – кратерот Језеро - но во меѓувреме, роверот Curiosity „растури“ од правење селфиња со фасцинантниот пејзаж на Марс.
Од 2014 година, Curiosity полека, но сигурно се искачува по планината Шарп висока речиси 5 километри, која се наоѓа во средината на кратерот Гејл. НАСА завчера ги објави новите фотографии од Марс кои биле снимени во март.
На 16 и 26 март, Curiosity сними 60 слики со помош на Mars Hand Lens Imager поставен на неговата роботска рака и 11 со камерата Mastcam што му стои „на глава“. Во фотографиите ја опфати фасцинантната карпеста формација наречена Монт Мерку, по планина во југоисточна Франција.
На селфињата, како и придружните величествени панорами направени на 4 март, Монт Мерку може да се види лево од роверот. Формацијата е висока околу шест метри.
„Ех, да бевте тука!“, гласи коментарот за селфито што го објави НАСА на Twitter во име на роверот.
До доаѓањето на Perseverance пред повеќе од еден месец, Curiosity беше единствениот ровер што е активен на Црвената планета. Двата ровера се оддалечени околу 3.700 километри.
Perseverance сега е зафатен со подготовки за летот на хеликоптерот Ingenuity. Летот што треба да биде изведен овојмесец ќе биде првиот лет на друга планета. После тоа, хеликоптерот ќе ја почне мисијата за барање древни форми на живот на Марс.
Роверот Perseverance бара знаци на живот и можно постоење на микроби на Марс – сега или во минатото. Натаму, ќе има и проучување на климата и геологијата, односно ќе се собираат примероци од карпите и од почвите.
Досега само Американците успеаја да спроведат подолги мисии со ровер на Марс, наречени „Pathfinder“, „Spirit“, „Opportunity“ и „Curiosity“ – кој е единствен кој е уште во функција.
