Свет

Русија геолокациски ќе ги следи заразените со коронавирус

23. март 2020 - 16:02 | МИА

Рускиот премиер Михаил Мишустин денеска објави рок од пет дена да биде развиен систем за следење мобилни телефони за да имаат информации за контакт на заразените лица со коронавирусот.

Според новиот систем, луѓето ќе добијат информации ако биле во контакт со заразено лице, а истите тие информации ќе бидат доставени до специјален регионален штаб за борба против Covid-19.

Кремљ објави дека мерките се легални и дел од стратегијата на Русија за спречување на ширењето на коронавирусот.

Ќе бидат следени „граѓаните во контакт со пациенти заразени со новиот коронавирус врз основа на телекомуникациски операторски информации за геолокација на мобилниот телефон на секоја личност, што ќе им овозможи на граѓаните да бидат информирани (преку мобилен телефон) дали биле во контакт со заразено лице и со испраќање релевантни пораки за тоа дали да одат во самоизолација“, се вели во соопштението на Министерството за комуникации.

Во Русија до денеска има 438 заразени од кои 71 се нови. Досега еден е починат, а 17 се излекувани.

Коментирај