Главниот штаб на вооружените сили на Руската Федерација во најкраток можен рок ќе им понуди појаснување на сите кои вршат делумна мобилизација за одложување на мобилизацијата. Ова упатство денес го даде рускиот министер за одбрана Сергеј Шојгу, пренесе руската новинска агенција ТАСС.
Освен тоа, Шојгу нареди да се престане со кршење на правата на граѓаните за време на делумната мобилизација, како и да се обезбеди потребното за оние кои ги пополнуваат редовите на руските вооружени сили.
Како што соопшти, над 200.000 луѓе веќе пристигнале во вооружените сили како дел од мобилизацијата.
Рускиот претседател Владимир Путин не бил задоволен од начинот како е извршена мобилизацијата, па побарал од министерството за одбрана брзо и темелно да се справи со грешките направени во текот на делумната мобилизација.
Според новите правила за мобилизација, право на одложување за одење на военото поле во Украина добија студентите, вработените во воено-индустриските организации, како и вработените во акредитирани организации во областа на информатичката технологија.
Одложување на мобилизација добија и вработените во медиуми, како и во банки и финансиски институции, како и родителите на „деца со неизлечливи болести или три деца од кои едно е инвалид“.
Од мобилизација се ослободени оние кои постојано се грижат за член во семејството, имаат 4 или повеќе деца до возраст од 16 години или четири и повеќе браќа и сестри до 8 години (под услов мајката да ги одгледува без таткото), оние кои се прогласени за привремено неспособни за војска од здравствени причини, воени пензионери отстранети од воена регистрација, како и Русите кои не се регистрирани во војска бидејќи имаат постојано живеалиште надвор од земјата.
