Русија во вторникот го изведе најголемиот ракетен напад на Украина од првата недела на војната.
Британското Министерство за одбрана објави дека во вчерашните напади Русија испукала до 80 ракети со долг домет во правец на украинската енергетска инфраструктура.
Како што наведоа, од почетокот на инвазијата, ова е најголем број напади изведени од Русија во еден ден. Проектилите биле испукани од воздух, од море и од земја.
„Иако голем број проектили успешно се пресретнати, Украина се соочува со значително опаѓање на енергијата достапна од националната мрежа. Ова ќе влијае на пристапот на цивилите до комуникација, топлина и вода“, наведено е во анализата.
Според американската амбасадорка во УН, Линда Томас Гринфилд, овие напади за цел имаат да го смрзнат Киев до покорност.
Русија и утринсвс изврши голем ракетен напад врз Одеса. Кабинетот на украинскиот претседател Володимир Зеленски и шефовите на регионалните администрации ги потврдија нападите врз критичната инфраструктура во Одеса и Днепар.
Локални функционери изјавија дека во Киев и Днепар работат системите за противвоздушна одбрана со цел соборување на проектили. Според неофицијални информации, експлозии се слушаат и во неколку други градови, кои најверојатно потекнуваат од системот за противвоздушна одбрана.
Познавачите претпоставуваат дека се работи за уште еден напад врз украинската енергетска инфраструктура.
„Непријателот мисли дека ќе ја ослабне нашата одбрана со удар на енергетската инфраструктура. Тоа е наивна тактика на кукавици и губитници, но ние сме подготвени на тоа“, изјави шефот на кабинетот на украинскиот претседател Володимир Зеленски, Андриј Јермак.
„Украина веќе претрпе исклучително тешки удари кои ги немаа очекуваните резултати на кои се надеваа руските кукавици. Нема да успеат, ќе ги згазиме“, додаде Јермак.
