Рускиот министер за надворешни работи Сергеј Лавров рече дека новата надворешна политика на Москва ќе се фокусира на ставање крај на, како што рече, „монополот“ на Западот врз глобалните работи, обвинувајќи го Западот за потиснување на ривалските центри на моќ.
Руските државни медиуми минатата недела објавија дека претседателот Владимир Путин е подготвен да одобри нова надворешна политика додека односите со Западот се на историски најниско ниво поради војната во Украина и санкциите од Западот.
„Англосаксонците и остатокот од колективниот Запад, кој несомнено им се покорува, по секоја цена се обидуваат да го наметнат својот диктат на светските работи“, им рече Лавров на пратениците во Думата.
„Нашиот обновен концепт на надворешната политика ќе се фокусира на потребата да се стави крај на монополот на Западот во обликувањето на рамката на меѓународниот живот, кој во иднина мора да биде определен не од неговите егоистички интереси, туку од праведен, универзален баланс на интереси.“
Кремљ често ги обвинуваше западните земји, на чело со „англосаксонските“ САД и Велика Британија, дека се обидуваат да доминираат во глобалната политика и се мешаат во туѓите работи. Паралелно, тие ги потиснуваат растечките сили во Азија, Латинска Америка и Африка, тврдат Русите.
Западните земји тврдат дека Русија се изолирала на глобалната сцена со инвазија на соседна земја и дека групите поддржани од Русија се мешале во изборните процеси на Запад. Евгениј Пригожин, истакнат сојузник на рускиот претседател Владимир Путин, сега отворено го признава тоа.
