Русија ќе се повлече од проектот за Меѓународната вселенска станица (МВС) по 2024 година и има намера да изгради своја вселенска станица.
Новиот шеф на Роскосмос, Јуриј Борисов, изјави дека Русија ќе ги исполни сите свои обврски кон партнерите поврзани со проектот МВС, но дека е донесена одлука за повлекување по 2024 година. Тој за ова го информирал и рускиот претседател Владимир Путин на средбата одржана во Кремљ.
„Мислам дека дотогаш ќе почнеме да ја склопуваме руската орбитална станица“, истакна Борисов.
Според неговата визија, летовите на космонаутите во вселената треба да бидат дел од систематска научна програма, така што секоја мисија ќе ѝ обезбеди на Русија ново знаење. Претходниот шеф на Роскосмос, Дмитриј Рогозин, предвиде дека МВС, која американската вселенска агенција НАСА планира да ја користи до 2030 година, ќе се распадне дотогаш доколку не се вложат огромни средства во поправки.
Но, напорите да се задржи станицата во орбитата повеќе не се профитабилни за Русија поради актуелната геополитичка ситуација, посочи тој.
Борисов во април изјави дека руските модели дошле до крајот на својот животен век.
МВС беше лансирана во 1998 година како заеднички проект на руските, американските, јапонските, канадските и европските вселенски агенции и беше поделена на американски и руски дел.
Роскосмос претходно објави скици од својата идна вселенска станица, наречена РОСС (Руска орбитална сервисна станица), а станицата се планира да биде автоматизирана бидејќи космонаутите ќе доаѓаат за сервисирање и замена на опремата. РОСС се состои од четири модули и платформа за одржување на летала и е дизајнирана да прими екипаж од два до четири члена.
