Официјална Москва потврди дека Русија ќе се повлече од Меѓународната вселенска станица бидејќи веќе работи на нова која ќе биде и нејзина замена.
„Ќе ги известиме нашите партнери за повлекувањето од МВС кое ќе го започнеме од 2025 година“, рече рускиот вицепремиер Јури Борисов за ТВ каналот Россия-1. Додаде и дека Русија ќе се консултира со останатите држави за идната соработка кога станицата ќе престане да функционира.
Животниот век на МВС е заклучно со 2024 година, а веќе со години проблемите само се зголемуваат. Астронаутите се мачат со поправки на истекување воздух поради пукнатини во модулите. Владимир Соловјев, втор човек на Энергия, во ноември изјави дека веколку елементи од станицата се оштетени до таа мера што нивна поправка е невозможна и станицата треба да биде затворена по 2025 година. Энергия моментално ја одржува МВС, а работи и на нова станица која треба да ја замени сегашната.
Првиот елемент на МВС беше лансиран во 1998 година. Животниот век на станицата првично беше продолжен до 2020, а потоа до 2024 година.
Првиот човек на руската вселенска агенција Роскосмос, Дмитриј Рогозин, минатата година рече дека кога МВС ќе престане на работи, вселенски карго-брод ќе ја повлече од орбитата. Потоа МВС ќе се спушти во океан на истиот начин на кој руската вселенска станица Мир се спушти во 2001 година.
