Протестите во Франција се внатрешна работа на таа земја, Кремљ не се меша во внатрешите работи на други земји и тврдењата дека Русија е вмешана во француските протести се клевета, изјави денеска портпаролот на Кремљ, Дмитри Песков.
„Би сакал да истакнам дека Русија смета дека сѐ што се случува таму е внатрешна работа на Франција. Ние не сме се мешале и нема да се мешаме во внатрешните работи на ниту една земја, вклучувајќи ја Франција“, рече Песков на прес-конференција.
Тој додаде дека Москва е длабоко посветена на развивање на односите со Париз и ја почитува сувереноста на Франција.
Вчера францускиот министер за надворешни работи Жан-Ив ле Дриен рече дека Секретаријатот за национална одбрана и безбедност на Франција (SGDSN) отворил истрага по информациите дека Русија наводно била вмешана во протестите на т.н. „Жолти елеци“ во Франција.
Оваа информација следеше откако Times објави текст во кој тврди дека стотици профили на Twitter наводно поврзани со Русија ги подгревале протестите во Франција со објавување на фотографии со повредени демостранти и ретвитање на постови поврзани со насилните немири.
Франција се соочува со бран масовни протести од средината на ноември, кога демонстрантите кои носат заштитни жолти елеци како знак на распознавање, излегоа на улиците во знак на протест против зголемените цени на горивата и планираното покачување на даноците за дизел горива.
Протестите се засилија минатата недела, а викендов ескалираа со апсење на над 1.700 демонстранти.