Русија нема да извезува нафта на светскиот пазар доколку нејзината цена е пониска од цената на производството, стои во изјавата на вицепремиерот Александар Новак.
Американската министерка за финансии Џенет Јелен е за ограничување на цената на нафтата за да ѝ се отежне на Москва да ги финансира воените операции во Украина, а нејзиниот предлог го разгледува групата Г7 на водечките светски економии.
Предложениот механизам предвидува забрана за осигурување и транспорт на нафта чија цена надминува одредено ниво. Сè уште не е познато која би била горната граница.
„Ако цените за кои зборуваат се пониски од трошоците за производство на нафта, тогаш Русија, се разбира, нема да пласира таква нафта на светските пазари. Тоа едноставно значи дека нема да работиме со загуба“, изјави вчера рускиот вицепремиер за телевизија Канал 1.
САД очекуваат цената на руската нафта да биде ограничена до декември
Неименувани американски претставници велат дека целта е да се одреди цена која ќе ги покрие маргиналните трошоци за производство за да се охрабри Русија да продолжи со извозот. Рускиот претседател Владимир Путин во средата им изјави на новинарите дека цените на нафтата вртоглаво ќе пораснат ако цената се ограничи, забележува Reuters.
Бразил, Кина, Индија и некои африкански и блискоисточни земји го зголемија увозот на енергетски производи од Русија, која ги продава со огромни попусти во споредба со цените на светските пазари, бидејќи многу европски рафинерии престанаа да купуваат руска нафта.
САД очекуваат цената на руската нафта да биде ограничена до декември, кога ембаргото на ЕУ треба да стапи на сила, рече заменик-министерот за финансии, Вали Адејемо, на состанокот во Аспен во средата.
