Неименувани американски функционери за повеќе медиуми изјавија дека Русија побарала воена помош од Кина. Како одговор на тоа, САД порачаа дека Пекинг ќе се соочи со последици ако го стори тоа. Но, од Кина им возвратија дека и „и тие долеваат масло на огнот“.
Новинарот и поранешен уредник на кинескиот државен весник Global Times, Ху Сиџин смета дека Кина и САД мораат да постигнат договор со кој би ги повикале сите земји да престанат со насочување воена помош за Украина бидејќи „тоа претставува само дополнително создавање на конфликт“.
Неговата објава на Twitter следеше само неколку часа откако САД го предупредија Пекинг дека „апсолутно ќе се соочи со последиците“ ако помогнe Москва да ги избегне сеопфатните санкции поради војната во Украина.
Од почетокот на кризата, Пекинг изрази силна реторичка поддршка на Русија, но не е познато дали воено им помогнале. Кина јавно ги осуди Велика Британија, САД и другите земји за наоружување на украинската војска, велејќи дека со тоа додаваат „масло на огнот“.
Колку што е засега јавно познато, Кина нема пружено никаква конкретна помош на Русија.
Во интервју за CNN, американскиот советник за национална безбедност Џејк Саливен изјави дека тие директно комуницираат со Пекинг порачувајќи дека ќе има последици во вид на економски санкции ако ја поддржат Русија, пишува BBC.
