Репрезентацијата Русија ќе ја нагости Македонија во градот Перм, одлучи Кошаркарската федерација на Русија во врска со градот домаќин на квалификацискиот натпревар.
Македонија ќе гостува во Перм на 23 февруари 2020 година. Натпреварот ќе се игра во салата „Молот“ која е со капацитет од 7 илјади гледачи и во која летоска Русите го организираа Купот на мирот како подготовка за нивниот настап на Мундобаскетот во Кина. Се работи за таканаречен дворец на спортовите каде домаќини се хокеарскиот клуб Молот и кошаркарскиот Парма.
Градот Перм се наоѓа во источниот крај од европскиот дел на Русија. Лежи на реката Кама под планините Урал.
Три дена претходно Македонија ќе ги отвори квалификациите на домашен терен против Естонија. Во групата е уште и Италија, а првите три ќе обезбедат пласман на завршницата.
Европското првенство ќе се одржи од 17 август до 3 септемвриво 2021 година во пет градови во четири различни држави: Прага (Чешка), Тбилиси (Грузија), Милано (Италија), Келн и Берлин (Германија).