Руските научници планираат три мисии на Венера до 2034 година, кои ќе се обидат да испорачаат почва од таа планета за прв пат во историјата, соопшти Лео Грин, научен директор на Институтот за вселенски истражувања на Руската академија на науките.
„Веќе не размислуваме за една мисија Венера-Д, туку за цела програма… Како крајна мисија се разгледува апсолутно фантастичната замисла за испорака на почва од Венера“, изјави Грин во Москва.
Според него, Роскосмос планира три мисии во рамките на руската програма за проучување на Венера за 2029, 2031 и 2034 година. Во 2029 година, леталото Венера-Д со орбитални, слетувачки, демонстративни и атмосферски модули ќе се упати кон соседот на Земјата. Експедицијата 3, којашто научниците имаат намера да ја лансираат во 2034 година, ќе вклучува модули за летање и балони, како и уреди за слетување и враќање.
Името Венера-Д е сктратеница од Венера Долгоживущая (Венера долговечна).
Русија, како Советскиот Сојуз, уште во 1961 година стана првата која испрати мисија на оваа планета. Леталото Венера-1 на 19 мај таа година прелета блиску до Венера и потоа поради преголемата топлина изгуби контакт со Земјата.
Потоа во 1967 година мисијата Венера-4 успешно навлезе во атмосферата на планетата станувајќи првото летало кое успешно влегло во атмосфера на друга планета. Оттаму испрати податоци за составот на нејзината атмосфера, а потоа поради огромната топлина беше уништено.
Иако по големина е слична на Земјата, Венера има атмосфера со 97% јаглероден диоксид и просечна температура од 464°C, што ја прави неподнослива за живот.
