Во напад со дрон беа погодени неколку згради во Москва со „мали“ оштетувања и без сериозни повреди, изјави градоначалникот на руската престолнина Сергеј Собјанин утрово.
„На местото на несреќата се сите служби за итна помош од градот“, изјави Собјанин.
Руската државна новинска агенција РИА објави дека некои жители на зградата на улицата „Профсојузнаја“ во јужниот дел на Москва се евакуирани. Неколку руски канали за пораки Telegram објавија дека четири до десет беспилотни летала биле соборени на приодите кон градот.
Reuters не можеше независно да ги потврди извештаите.
Руското Министерство за одбрана тврди дека Киев стои зад „терористичкиот напад“ со беспилотни летала врз руската престолнина.
Министерството соопшти дека во нападот учествувале осум беспилотни летала и дека сите биле уништени со противвоздушни ракети.
Тие исто така рекоа дека неколку дронови паднале врз згради, предизвикувајќи „мали штети“. Градоначалникот на Москва тврди дека две лица побарале лекарска помош по нападот. Рускиот истражен комитет соопшти дека го истражува нападот со дрон.
„Утринава режимот на Киев изврши терористички напад со беспилотни летала врз објекти во Москва. Во нападот учествуваа осум беспилотни летала. Погодени се сите непријателски беспилотни летала“, соопшти Министерството.
