Рускиот министер за надворешни работи Сергеј Лавров и советникот на Владимир Путин, Јуриј Ушаков, денеска се состанаа со високи американски дипломати во Саудиска Арабија.
На состанокот присуствуваа американскиот државен секретар Марко Рубио, американскиот советник за национална безбедност Мајк Валц, американскиот пратеник за Блискиот Исток Стив Виткоф, рускиот министер за надворешни работи Сергеј Лавров и советникот за надворешна политика на рускиот претседател Владимир Путин, Јуриј Ушаков.
Целта на разговорите, според тврдењата на Москва, е обновување на билатералните односи.
Лавров рече дека целта на разговорите ќе биде завршување на „ненормалниот период“ во односите на двете „големи сили“. Дискусијата би можела да ги постави и темелите за потенцијална средба меѓу американскиот претседател Доналд Трамп и рускиот претседател Владимир Путин, јавува CNN.
Во руската делегација е и Јуриј Ушаков, советник на рускиот претседател Владимир Путин за надворешна политика. Тој, по пристигнувањето во Ријад, рече дека разговорите за Украина ќе бидат исклучиво билатерални, извести руската државна новинска агенција РИА.
„Дојдовме да преговараме само со американските колеги. Главно е да започне вистинска нормализација на односите меѓу нас и Вашингтон“, рече Ушаков, а пренесува РИА. „Ова се билатерални разговори, чисто билатерални. Не може да има никакви трилатерални разговори во Ријад.“
И американската страна нагласи дека на денешниот состанок не станува збор за почеток на преговори, туку за да се утврди дали Русија е „сериозна“ околу завршувањето на војната во Украина, јавува BBC.
Русија вели дека нејзин приоритет е почеток на нормализација на односите со САД.
Состанокот, од кој се исклучени Украинците и Европејците, доаѓа среде дипломатски превирања предизвикани од минатонеделниот разговор меѓу Трамп и Путин, кој го разби единството на Западот против Москва.
Европејците во понеделникот се состанаа во Париз за да разговараат за нивната стратегија, додека украинскиот претседател Володимир Зеленски пристигна во Турција за да се состане со својот колега Реџеп Таип Ердоган во вторник и во Саудиска Арабија во среда. Специјалниот пратеник на САД за Украина, Кит Келог, ќе отпатува во вторник во Полска, а потоа во Киев во четврток.
Од американска страна, државниот секретар Марко Рубио престојуваше уште во понеделникот во Саудиска Арабија каде го прими престолонаследникот Мохамед бин Салман.
