Вселенските агенции на Русија и САД, Роскосмос и НАСА, се во преговори за меѓусебно обезбедување места на летовите до Меѓународната вселенска станица.
Ова го изјави Анатолиј Красников, претставник на Роскосмос во Казахстан.
„Зборуваме за ситуации кога руските космонаути ќе летаат на американски вселенски бродови, а американските астронаути ќе продолжат да летаат со наши вселенски летала. Јасно е дека ова претставува итна потреба, имајќи предвид дека гледаме дека има нов систем на префрлање човечки екипаж до МВС“, изјави Красников на прес-конференција.
Членовите на екипажот на МВС мора да бидат способни да ракуваат и со руски и со американски транспортни системи за да си обезбедат меѓусебна поддршка, рече Красников, истакнувајќи дека има интерес од двете страни.
Во име на Роскосмос, Красникот им честиташе на американските колеги за успешното лансирање.
„Им честитаме од срце, тоа е навистина голем успех за нив и нешто фантастично“, рече Красников.
