Организаторите на натпреварот Песна на Евровизија и предложија на руската пејачка Јулија Самојлова својот настап на Евросонгот да го изведе преку сателит, откако украинските власти и забранија влез на територијата на Украина.
Европската радиодифузна унија соопшти дека ќе ги почитува законите на земјата домаќин, но и дека „длабоко жали заради таквата одлука која е во спротивност на духот на натпреварувањето и отстапува од неговите вредности“.
Организаторот наведе дека долго размислувал како на руската натпреварувачка да и овозможи настап во полуфиналето што ќе се одржи на 11 мај во Киев.
„Ако Русија се квалификува, би можела на ист начин, преку сателит, да учествува во финалниот дел од натпреварувањето, закажано за 13 мај“, додаваат од Европската радиодифузна унија со седиште во Женева.
Украина ѝ забрани на Самојлова да влезе на нејзина територија бидејќи таа порано го посетила Крим, без да влезе преку официјалната украинска граница.