Руската државјанка Марија Бутина, која во САД е обвинета дека работела како таен агент за руската Влада, призна вина пред американскиот Суд за еден дел од обвинението, јави Fox News, додавајќи дека признанието е во рамки на договорот со обвинителите.
Американско Федерално обвинителство го поднесе обвинението против Бутина во јули годинава.
Марија Бутина призна дека заговарала против САД и безбедноста на државата под наредба на официјални лица од Русија. Таа рече дека само работела според наредбите на две лица, од кои едниот беше идентификуван како поранешен руски сенатор и вработен во централната банка, Александер Торшин.
Американските власти дознаа за операцијата на Бутина во април оваа година и оттогаш му забранија пристап на американска територија на Александер Торшин, додека Марија Бутина беше затворена без право на кауција веќе во јули оваа година.
Бутина има завршено факултет во Вашингтон, а работела како активист за правото за користење оружје.
Како што наведуваат медиумите, Бутина се согласила да соработува со американските власти.
