Езеро со небесно сина боја во близина на Новосибирск стана популарна Instagram атракција бидејќи изгледа како рајска туристичка дестинација. Но, капењето во него е забрането, пишува Sputnik.
Социјалните мрежи на руските посетители се преполни со фотографии од неверојатно убавото езеро. Девојки се фотографираат во костими за капење, вљубени парови се држат за раце и сè изгледа идеално. Езерото е наречено „Руски Малдиви“ поради прекрасните нијанси на сина боја. И сето ова изгледа прекрасно на Instagram.
Но, која е вистината? За езерото се зборува дека е отровно, смртоносно, па дури и радиоактивно. Всушност, ова не е езеро. Станува збор за јама ископана за потребите на термоелектрана, а во водата се слеваат сите нечистотии кои се добиваат по согорување на јаглен. Депонијата од пепел има сина боја од повеќе фактори. Водата е полна со раствори од соли на калциум и оксиди од различни метали и се смета за депонија длабока до 2 метри. Депонијата не е радиоактивна, така барем велат две независни лаборатории кои ја испитале водата.
Дното на езерото е како жива кал, човек не е во состојба сам да се извлече од него и затоа не е дозволено капење.