Русија негира дека има програма за хемиско оружје, а во меѓувреме излегуваат на површина нови детали за труењето на поранешниот двоен агент Сергеј Скрипал.
Владимир Углев е руски научник кој во интервју за BBC призна дека помогнал во развивањето на нервниот агенс „новичок“ со кој беа отруени Скрипал и неговата ќерка Јулија.
„Целта беше да се произведе многу помоќна супстанца од нервниот агенс VX, дури и до десет пати појак. Ние го направивме токму тоа“, тврди 71-годишниот Углев .
Ако е овој отров толку моќен, како Скрипал и ќерка му преживеаја?
Углев смета дека рускиот агент примил многу мала доза.
Неделава беше објавено дека отровот бил доставен во течна форма.
Углев е свесен за одговорноста што ја сноси.
„Ова не се првите жртви што ги носам на душа. Можам да ви набројам уште десетина луѓе отруени со таа супстанца“, вели Углев кој работел во државна лабораторија во југозападна Русија.
Тој додава дека не е изненаден што Русија негира дека е вмешана во меѓународниот инцидент.
„Не е проблем на Путин, туку на општеството и државата. Логиката укажува на тоа дека зад сѐ стои Русија. Власта толку брзо се обиде да се огради од сѐ, како крадец во продавница, прв ќе викне дека не е виновен и ќе обвини некој друг“, смета Углев.
