Адвокатот на рускиот хокеар Иван Федотов (25 г.) изјави дека неговиот клиент бил приведен во Русија поради обвинувања дека избегнал служење воен рок, по што бил префрлен во воена болница бидејќи му се слошило.
Голманот на руската репрезентација, која годинава го освои среброто на Зимските олимписки игри во Пекинг, во мај потпиша едногодишен договор со НХЛ тимот на Филаделфија Флаерс.
Меѓутоа, руските медиуми во петокот објавија дека Федотов бил приведен од полицијата во Санкт Петербург на барање на военото обвинителство и бил одведен во канцеларија за регрутирање.
Адвокатот Алексеј Пономарјов синоќа за државната новинска агенција РИА изјави дека Федотов во петокот бил одведен во канцеларијата за регрутирање, а потоа во воена болница откако му се слошило.
Минатата сезона Федотов со одлични перформанси ја предводеше ЦСКА Москва од Континенталната хокеарска лига (КХЛ) до титулата шампион на лигата, односно Гагарин купот.
Да потсетиме, најсилната хокеарска лига НХЛ ги прекина деловните односи со Русија, но не им забрани на повеќе од 50 играчи да играат во своите тимови.
Исто така, НХЛ не му дозволи на победникот на Стенли купот, Валериј Ничушкин од тимот на Колорадо Аваланш да го однесе трофејот во Русија, што претходно го правеа сите руски хокеари во северноамериканската лига.
