Производителот на руски автомобили од суперлуксузната класа Aurus има намера да пласира 200 теренци Komendant во 2023 година и дополнително да го зголеми производството во следните години, пишува Russia Beyond.
„Планираме да произведеме 200 автомобили Aurus Komendant во 2023 година“, соопшти информативната служба на компанијата.
„Ова е вкупна бројка која вклучува автомобили произведени во фабриката Aurus во Република Татарстан, како и во фабриката FGUP NAMI.
За споредба, информативната служба како пример ја наведе статистиката за продажба на странски автомобили во овој сегмент од пазарот. Бентли, на пример, продаде 256 автомобили од различни модели во Русија во 2021 година.
Во 2023 година, Aurus планира да лансира приближен број возила на пазарот, но се работи само за еден модел, а тоа е гореспоменатиот Komendant.
Aurus во наредните години ќе го зголеми обемот на производството во согласност со бизнис планот на својот проект, додаваат од компанијата.
Aurus е руски автомобилски бренд од високата класа. Во моментов се произведуваат два модели - лимузината Senat и теренецот Komendant.
Производството на Komendant започна на крајот на ноември годинава. Компанијата прецизираше дека почетната цена на автомобилот ќе биде 33,7 милиони рубљи (околу 437.000 евра). Продавачите на возила од овој бренд почнаа да добиваат прелиминарни нарачки за Komendant на крајот на септември.
Производството на првиот модел, седанот Senat, започна во мај 2021 година (податоците за обемот на производство и продажба не се објавени).
