Руските банки почнаа поактивно да вложуваат во резерви на злато и други благородни метали.
На крајот на август имаа акумулирано 121 тон злато, што е рекордна состојба, стои во извештаите на Централната банка на Русија.
Обемот на вложување на банките во злато и други благородни метали на 2 септември изнесуваше 567,8 милијарди рубљи (околу 7 милијарди евра).
Овој раст во споредба со претходниот максимум постигнат во октомври 2019 година, изнесува 10,9 отсто, објави Спутник.
Во текот на август, количините на залихите на благородни метали во руските банки пораснаа за 23,3 тони. Кон крајот на јули беше достигнат деветгодишен максимум и обемот продолжи да расте.
Растот на инвестиции во злато во банкарскиот сектор почна во мај. Економистите ваквата политика ја објаснуваат со стравот од понатамошен пад на стопанството и берзите како резултат на пандемијата со коронавирус.
Златото традиционално се смета за сигурна актива, а во време на кризи растат и побарувачката за злато и неговата цена.