Руските космонаути снимија кратка видеотура низ внатрешноста на истражувачкиот модул на Меѓународната вселенска станица (МВС), во која во четвртокот се случи несреќа, неколку часа по слетувањето, поради што целата станица накратко беше надвор од контрола.
Целата вселенска станица со седум членови на екипажот беше исфрлена од својата нормална орбита, која се наоѓа на околу 400 километри над Земјата, а експертите наведуваат дека несреќата била предизвикана од грешка во компјутерската програма, но исто така е можно да се работи за човечка грешка.
Видеото, објавено доцна во саботата навечер, покажува како астронаутите Олег Новицки и Пјотр Дубров ги отвораат вратите од делот за истражување, модулот „Наука“, каде што се случила несреќата, и ја обиколуваат внатрешноста, објави руската вселенска агенција Роскосмос.
Според извештајот за несреќата објавен од НАСА, шефот на мисијата веднаш прогласи вонредна состојба бидејќи експертите на Земјата работеа брзо за да ја вратат стабилноста на истражувачкиот сателит што е можно поскоро.
Според НАСА и Роскосмос, членовите на екипажот на Меѓународната вселенска станица - двајца руски космонаути, тројца американски и по еден астронаут од Јапонија и Франција - во ниту еден момент не биле изложени на директна опасност.
Според Reuters, руската агенција Роскосмос, која неделава објави дека планира да лансира друг истражувачки модул како дел од Меѓународната вселенска станица во ноември, неодамна претрпе серија несреќи и скандали поврзани со корупција. Меѓу другото, за време на изградбата на космодромот Восточни на крајниот исток од земјата, изведувачите беа обвинети за проневера на државни пари.