Администрацијата на американскиот претседател Доналд Трамп го зголемува притисокот над Иран со нови санкции.
Имено, САД воведe нови санкции за пет граѓани на Иран, поради поддршка на шиитските протестанти во Јемен.
Американското Министерство за финансии соопшти дека петте Иранци ќе бидат ставени на „црната листа“, поради тоа што им давале стручна помош на хутските протестанти, што им овозможила на нив да лансираат ракети во соседната Саудиска Арабија.
Овие пет Иранци или се припадници на иранската револуционерна гарда, или се поврзани со неа, пренесуваат светските медиуми.
Со овие санкции им се замрзнува каков било имот, кој би можеле да го имаат под јурисдикција на САД, а на Американците им се забранува да вршат било какви трансакции со нив.
Американскиот државен секретар, Мајк Помпео, во понеделникот истакна дека САД ќе ги зајакне напорите против групите кои му даваат поддршка на Иран, како што се Хути, либанската група Хезболах, палестинското движење Хамас, како и сириската влада, откако американскиот претседател Доналд Трамп одлучи САД да се повлечат од нуклеарниот договор со Иран.
Помпео од порано му се закани на Иран со „најсилни санкции во историјата“, во случај да не дојде до промени на курсот во владата во Техеран, но и додаде дека Вашингтон е подготвен да ги прекине сите акции и да воспостави полни дипломатски и трговски односи, ако Иран направи „големи промени“.