Претседателот на САД Доналд Трамп соопшти дека САД ќе ја стави Северна Кореја на листата на земји кои го поддржуваат меѓународниот тероризам.
Трамп изјави дека кон Северна Кореја ќе бидат наменети уште санкции, тврдејќи дека Пјонгјанг одамна требало да се најде на листата и дека ова е дел од „кампањата за максимален притисок“ против оваа држава.
Моментално на листата се наоѓаат Иран, Судан и Сирија.
„Покрај тоа што на светот му се заканува со нуклеарно уништување, Северна Кореја во повеќе наврати ги поддржа чиновите на меѓународен тероризам, вклучувајќи и атентати на странска територија“, изјави Трамп.
Американски функционери како пример го наведоа атентатот на полубратот на севернокорејскиот лидер Ким Џонг Ун од минатата година, на меѓународниот авион во престолнината Малезија, Куала Лумпур.
Одлуката дали Северна Кореја ќе биде ставена на листата се разгледувала во администрацијата на САД, а некои функционери на Стејт Департмент изнесоа аргументи дека Северна Кореја не ги исполнила сите правни стандарди да се најде на оваа листа.
Со оваа одлука на САД, Северна Кореја повторно ќе се најде на оваа листа, прв пат од 2008 година, кога беа отстранети од листата со намера да се дојде до договор и да се стави крај на нивната нуклеарна програма.
Членовите на конгресот во САД вршеа притисок на Трамп повторно да ја стави оваа земја на списокот на држави кои го поддржуваат тероризмот, поради напредокот во ракетните и нуклеарните програми на Пјонгјанг.