Специјалниот американски пратеник за Иран, Брајан Хук, му упати закана на Есмаил Гани, кој на позицијата командант на специјални сили „Кудс“ на иранската Револуционерна гарда, дојде на почетокот на месецот на местото на убиениот Касим Сулејмани.
Хук за саудискиот весник الشرق الأوسط (Asharq Al-Awsat) кажа дека смртта на Сулејмани, кој беше убиен на 3 јануари во американскиот воздушен напад со дрон во близина на аеродромот во Багдад, „е празнина која иранскиот режим тешко ќе ја пополни“, пренесува Anadolu Ajansı.
- Ако и Есмаил Гани го следи патот на убивање Американци, ќе го снајде истата судбина, рече Хук, запрашан за новиот командант на силите „Кудс“ и што ќе се случи доколку тргне по истиот пат како Сулејмани.
Хук кажа дека за напади врз Американците или интересите на САД во регионот како одговорни ќе ги сметаат иранскиот режим и силите кои делуваат во негово име.
