Вашингтон, 16 мај 2010 (МИА) – Белата куќа не ја потпиша меѓудржавната иницијатива наречена „Повик на Крајстчерч“, поддржана и од главните технолошки компании, за спречување на ширење екстремизам на интернет, пренесува дописникот на МИА од Вашингтон.
„Повикот на Крајстчерч“, договор што вчера во Париз го потпишаа девет земји и седум технолошки компании, е одговор на нападите во март врз две џамии во Крајстчрч на Нов Зеланд, при што загинаа 51 лице.
Текстот од три страници, изготвен од новозеландската премиерка Џасинда Ардерн и францускиот претседател Емануел Макрон, повикува на регулација на интернет службите заслужни за ширење на екстремистички содржини, без да се загрози слободата на говорот.
Белата куќа соопшти дека во принцип ја прифаќа „проценетата порака“ на оваа иницијатива, но дека „во моментов не е во состојба да се придружи“.
Според позицијата на САД, идеолошките разлики помеѓу улогата на власта и владеењето на слободата на говорот ја усложнува борбата против екстремистичките содржини на социјалните мрежи, како на пример терористичката пропаганда.
Договорот предвидува владите и технолошките компании како Facebook и Twitter, да дејствуваат координирано. Во случај на терористички напади се предвидува формирање на кризен план за споделување информации и моментно блокирање на емитувањето видео содржини кои прикажуваат насилство во живо. Видео стриминг алатките на Facebook беа искористени за емитување во живо на сцените од самите напади во Крајстчрч.
Администрацијата во Вашингтон од своја страна им дава слобода на самите компании да воведат свои правила и да забранат употреба на нивните платформи како алатки на терористите.
Потписници на договорот се Велика Британија, Индонезија, Ирска, Јордан, Канада, Нов Зеланд, Норвешка, Сенегал и Франција и компаниите Facebook, YouTube, Google, Amazon, Twitter, Microsoft и Daily Motion.