Кина го повика Џо Бајден да не ја „потценува“ нејзината „цврста решеност да го заштити својот суверенитет“, обраќајќи му се на американскиот претседател, кој претходно денеска вети дека ќе употреби сила во случај на кинеска инвазија на Тајван, додека Тајпеј не го криеше своето задоволство со изјавата на Бајден.
Бајден во Токио рече дека САД воено ќе го бранат Тајван во случај на инвазија на Пекинг на автономниот остров, предупредувајќи дека Кина „флертува со опасност“ во своите воени маневри.
„Веднаш бараме од САД да избегнуваат испраќање лоши сигнали до силите кои се залагаат за независност на Тајван“, изјави портпаролот на кинеското Министерство за надворешни работи, Ванг Венбин.
Тајпеј ја поздрави пораката на Бајден
Тајпеј, пак, ја поздравува пораката на Бајден дека Вашингтон воено ќе го брани Тајван во случај Пекинг да го нападне островот, кој Кина го смета за дел од своја територија.
Министерството за надворешни работи на Тајван му се заблагодари на Бајден што ја потврдил неговата посветеност на Тајван, додавајќи дека владата ќе продолжи да ја зајакнува одбраната и да ја продлабочува соработката со земји како САД и Јапонија за одржување на безбедноста.
Во Токио, Бајден разговараше со премиерот Фуми Кишид, кој на заедничката прес-конференција рече дека двете земји силно се спротивставуваат на обидот насилно да се промени статус квото во Источното Кинеско и Јужното Кинеско Море.
Бајден не пропушти да ја спомене Русија, за која верува дека треба „да плаќа долгорочна цена“ за нејзиното „варварство во Украина“, во однос на санкциите наметнати врз неа од САД и сојузниците и како пример за тоа што може да се случи со Кина.
„Не се работи само за Украина. Затоа што ако санкциите не се задржат во многу аспекти, каков сигнал би ѝ испратил тоа на Кина за цената на обидот да се заземе Тајван со сила?“, изјави Бајден.