Пандемијата со COVID-19, која и натаму трае, создаде многу проблеми, а за божикните и новогодипните празници донесе уште еден нов проблем во САД - нема доволно луѓе кои ќе се облекуваат како Дедо Мраз.
За разлика од минатите две години, во оваа 2021 година за 121% е порасната побарувачката за ангажирање луѓе кои треба да се облечат како најомилениот детски лик. Мич Ален од Hiresanta.com за Business Insider вели дека има најмалку 1.275 дедомразовци вработени на полно работно време (како оние во моловите) и над две илјади празни места за дедомразовци платени на час.
Тој напоменува и дека на пазарот на трудот моментално за 10% е намален бројот на луѓе кои бараат ваква работа, бидејќи некои долгогодишни работници починале од коронавирусот, некои се пензионирале, а трети едноставно престанале да се занимаваат со оваа работа поради пандемијата.
Според Тим Конаган, кој се има појавено како National Santa во повеќе новогодишни паради и како Father Christmas во добротворната организација Toys for Tots, околу 18% од неговите колеги одлучиле годинава да паузираат.
The Washington Post неодамна објави дека многу дедомразовци имаат одредени коморбидитети како последица од заразата со COVID-19, особено поради нивната возраст и прекумерната дебелина.
Прекинот во доставата на роба исто така влијае и врз ограничената достапност на дедомразовските костуми.
„Има многу потребни работи кои сѐ уште се наоѓаат на море во контејнери на бродовите. Нашите трговци на големо не ги имаат добиено своите порачани продукти од Кина... работи кои требаше да пристигнат во август ни доаѓаат дури сега“, вели портпаролот на компанијата Costumes for Santa.
