Саинс ја прифати понудата од Вилијамс

Шпанскиот Формула 1 возач Карлос Саинс ќе вози за тимот на Вилијамс од следната сезона. Шпанецот успешно ги заврши преговорите со британскиот тим за време на Големата награда на Белгија.

Саинс пред почетокот на сезоната дозна дека Ферари нема да му понуди нов договор, бидејќи во црвениот болид од наредната сезона ќе седне седумкратниот шампион Луис Хамилтон.

Постоеше можност Саинс да се пресели во тимот на Ауди, но на крајот тој сепак се реши да ја прифати понудата на Вилијамс.

Ова значи дека без место ќе остане Логан Сарџент, а колега на Саинс ќе му биде Алекс Албон.

„Многу ми е мило што објавувам дека ќе се приклучам на Вилијамс следната сезона! Возбуден сум за проектот и предизвиците пред нас!“, напиша шпанскиот возач на Х, додавајќи повеќе во видеото што го објави.